Хенрих Мхитарјан не е само одличен на зелениот терен. Малкумина знаат дека тој е всушност многу успешен и надвор од него, а доказ се двете универзитетски дипломи и фактот што течно зборува дури 6 јазици.
Поранешниот ерменски репрезентативец и сегашен играч на Интер беше гостин во подкастот „Frog Talks“ на Андреа Ранокија. Меѓу другото, откри и каков е надвор од теренот.
На прашањето на Ранокија колку јазици зборува, Мхитарјан одговори: „Оние што ги зборувам одлично се 5: ерменски, руски, англиски, француски и италијански. Германскиот малку го подзаборавив, но кога некој пријател ми зборува на германски разбирам и добро се сеќавам“. Има познавања и од португалски и украински, но скромен е, нив не ги брои.
Потоа Ранокија го праша: „А, вистина ли е дека имаш завршена два факултета?“
„Да, имам две дипломи“, одговори тој.
„Ах, честитки! Додека играш фудбал е навистина тешко да се студира!“
Тогаш Ерменецот додаде: „Служев и војска...“
„И војска?! Ама, чекај, колку години имаш што си ги направил сите овие работи? 80?“, врати Ранокија.
„Пасошот вели 35 години“, низ смеа одговори Хенрих.
Потоа водителот го праша што планира да прави откако ќе ја заврши играчката кариера.
„Имам многу проекти... сепак, тешко дека ќе останам во фудаблот. Во животот има толку многу работи да се научат, не смее да се живее само од фудбал. Прво сакам да поминам време со мојата фамилија и пријателите. Потоа сакам да научам некои работи што ќе ми бидат од корист во животот“, рече Мхитарјан.
После сето ова да го наречете Мхитарјан фудбалер - излегува како да го потценувате. Ерменецот низ годините воопшто не се фосилизирал само во својата професија, како што прават многу фудбалери, туку инвестирал во себе и во својата иднина. Едноставно, покажува дека во фудбалот постојат и играчи што се далекувидни и интелигентни.
Мхитарјан кариерата ја почна во младинските категории на Пјуник, а пред да заигра во сениорскиот тим мина еден период на позајмица во бразилски Саун Паулу. Потоа преку донечките клубови Металурх и Шахтар стигна до Борусија од Дортмунд, па на Островот во Манчестер Јунајтед и Арсенал, за од 2019 да дојде во Калчото во Рома и по три години во Интер, каде е и денес.
За репрезентацијата на Ерменија одигра 95 натпревари и постигна 32 гола, а разочара многумина кога во март 2022 година на 33-годишна возраст одлучи да замине во репрезентативна пензија.