Лука Модриќ откри голема вест: светското првенство во Катар ќе му биде последно на кое ќе настапи.
Капитенот на хрватската фудбалска репрезентација и играч на гигантот Реал Мадрид во разговор за FIFA+ каналот, кој го најавува претстојниот Мундијал во Катар, потврди дека веста за која долго време се шпекулираше, а се однесува на неговото простување под национал дрес, е вистинита.
„Свесен сум дека ми се наближува крајот на кариерата и ова Светско првенство е последно натпреварување на кое ќе играм за Хрватска“, потврди Модриќ.
„Некои луѓе често ме прашуваат зошто и натаму играм за Хрватска наместо да се фокусирам на клубот. Репрезентацијата е нешто многу посебно за мене. Нема поголема радост од тоа да се игра за својата земја. Моето опростување најверојатно ќе биде тешко“, додаде хрватскиот ас.
Модриќ досега одигра вкупно 7 големи натпреварувања за Хрватска, од кои 3 Мундијали (2006, 2014 и 2018) и 4 Европски првенства (2008, 2012, 2016 и 2020), а претстојниов во Катар ќе му биде четврти. Го пропушти оној во 2010 во Јужна Африка бидејќи Хрватска не успеа да се квалификува. За „Ватрените“ има одиграно 154 натпревари на кои постигна 23 гола, а врвот на кариерата го постигна на Мундијалот 2018 во Русија кога со Хрватска загуби во финалето, но ја доби наградата за најдобар фудбалер на турнирот.
Не е познато дали 37-годишниот Модриќ ќе се повлече веднаш по Мундијалот во Катар. Тоа веројатно ќе зависи и од резултатите на Хрватска, но и натаму постои можноста да ја одигра завршницата од Лигата на нации каде Хрватска обезбеди пласман во фанјлфорот и ќе разигрува за титулата во јуни, а можеби би одиграл и дел од квалификациите за ЕУРО 2024 доколку од него биде побарана помош за Хрватска да се пласира.
38 години ќе наполни на 9 септември наредната 2023 година.