Реал Мадрид се очекува наскоро да соопшти дека Лука Модриќ останува во клубот до јуни 2022 година.
Во Мадрид стравуваа како 35-годишниот Модриќ ќе ја поднесе оваа сезона, но капитенот на хрватската репрезентација е сепак еден од клучните играчи во тимот, па затоа решија да го продолжат неговиот договор.
„Условите се договорени и Модриќ наскоро ќе потпише договор. Тој се согласи на намалување на платата со цел клубот да се прилагоди на тешките времиња што владеат во светскиот фудбал“, пишува мадридски AS.
Според сегашниот договор, Модриќ заработува околу 10 милиони евра по сезона, а се шпекулира дека следната сезона ќе заработи два милиони помалку. Во клубот, пишува AS, особено го ценат фактот што Модриќ веднаш се согласи на намалување на платата и дека тој не бараше двегодишен договор, како што бараат другите ветерани на Реал.
Минатата сезона тренерот Зинедин Зидан го штедеше Модриќ и му даде само 2.600 минути. Францускиот стратег маше сличен план оваа сезона, но поради лошите резултати, мораше да ја зголеми минутажата на хрватскиот играч за врска, кој досега одигра 1.410 минути.
„Последните десет натпревари пред малата повреда играше во стартните 11, воопшто не се гледаше умор кај него. Беше брилијантен во најважните натпревари против Борусија и Атлетико. Планот на Реал е Модриќ уште една сезона да биде ментор на Мартин Одегард, играч сличен на него, кој би треба да го наследи Хрватот во Реал Мадрид“, пишува AS.
Модриќ е во Реал од 2012 година и новиот договор значи дека ќе мине најмалку една деценија во Мадрид.
