Премиерката на Молдавија, Наталија Гаврилица, во интервју за CNN, изрази загриженост дека земјата би можело да биде следната цел на руската инвазија.
„Загрижени сме, се разбира. Ризикот постои. Сè уште е хипотетичко сценарио, но ако руските сили се придвижат кон југозапад и кон Одеса, тогаш секако дека ќе бидеме многу загрижени“, рече премиерката на Молдавија.
„Тоа е многу тешка ситуација, не само за Молдавија, туку и за секоја мала земја, секоја земја која се потпира на меѓународниот поредок заснован на правила. Ако една земја може да започне војна за анексија без да го земе предвид меѓународното право, тогаш никој не е безбеден и мислам дека многу земји треба да бидат загрижени“, додаде таа.
Премиерката тврдеше дека Молдавија има „тешка историја во комплициран регион“ во светот, додавајќи дека војната во Украина нанела штета на нејзината економија.
„По Украина, Молдавија ги претрпе најтешките економски последици од војната. Веќе бележиме многу висока инфлација, во јуни беше 32 отсто“, заклучи премиерката.
