Министерството за образование и наука пред истекот на 2020 година изврши исплата на стипендии за три месеци за студентите запишани во учебната 2020/2021 година.
Во првите денови од 2021 година, до Редакцијата на Kajgana.com стигнаа прашања од неколку студенти на државните универзитети во врска со задоцнетата исплата на стипендиите. Поточно, реакции од студенти кои иако добиле потврден одговор од МОН на електронската апликација за стипендија, исплата уште не стигнала на нивните сметки, а нивни колеги веќе добиле исплати за стипендија за три месеци кон крајот на 2020 година.
Редакцијата на Kajgana.com побара појаснување од МОН дали исплатата е планирано да се врши во неколку етапи и ако да, кој е системот по кој се утврдува кои студенти во која етапа ќе добијат исплата? Во е-писмото исто така прашавме до кога е планирано да се заврши со исплата на стипендиите за минатата учебна година.
Од МОН ни одговорија дека во последниот квартал на 2020 година, извршиле целосна промена на начинот и динамиката на исплата на средствата за ученички и студентски стипендии и дека „повеќе нема доцнење на исплатата, односно на префрлање на средствата на сметките на корисниците како што се случуваше во минатото.“
„Новите добитници на стипендии за учебната, односно академската 2020/2021 година, како и оние корисници кои го продолжиле правото на стипендија стекнато во некоја од изминатите години, веќе ги добија средствата – три месечни износи кои им следуваа за 2020 година.
Единствено останаа неисплатени помала група студенти кои задоцнија со достава на договори до МОН за реализација на ова право, кои секако ќе бидат исплатени во следните денови (по процесуирање на предметите), како и оние студенти кои доставиле погрешна или непостоечка трансакциска сметка и кои исто така ќе бидат контактирани со цел обезбедување на точен податок заради префрлање на средствата“, велат од МОН за Kajgana.com.
Оттаму додаваат дека доколку некој студент има потреба од било каква информација, може слободно да ги контактира вработените во секторот за ученички и студентски стандард при МОН чии лични контакти се објавени ТУКА.
Инаку, воспоставена динамика на редовна исплата на стипендиите ќе продолжи да се реализира и понатаму. Сепак, се работи за средства кои значат поддршка и унапредување на ученичкиот и студентскиот стандард, го помагаат процесот на образование и претставуваат мотивација за младите во текот на учењето, стои во дописот од МОН.