Русинот Александар Атаманов објави видео од вооружено куче-робот како пука од автоматска пушка додека се движи. Снимката делува забавно, но и морбидно застрашувачки.
Ваквата технологија е применлива во реални ситуации, а вооруженото робот-куче на Атаманов не е единственото во светот.
Кучињата-роботи можат да се користат во урбани средини, особено во опасни ситуации и антитерористички акции. Можат да се покажат ефикасни и на отворен терен, а не би било првпат вооружена машина да убие човек во борбени акции.
Видеото кое прикажува куче-робот опремено со автоматска пушка стана вирално на социјалните мрежи. Автор е Александар Атаманов, а на теренот се гледа и паркирано борбено возило. Атаманов кариерата ја започна во авионската и вселенската индустрија, а во 2014 година основа своја компанија со седиште во Калифорнија. Тој не го дизајнираше роботот, а прикажаниот модел веројатно може да се купи онлајн за неколку илјади долари, пишува The Drive.
Иако робот потсетува на кучето-робот Spot на компанијата Boston Dynamics, самата компанија забранува вооружување на Spot.
Минатата година компанијата Ghost Robotics од Филаделфија претстави сличен робот-убиец кој предизвика различни реакции.