Жозе Мурињо повторно даде легендарна изјава, а во врска со очекувањата на луѓето од неговата работа. „Некои мислат дека сум волшебник“, рече тој, алудирајќи на ликот на Хари Потер од книгите на Џ.К. Роулинг.
Рома синоќа загуби од Милан со 3:1, по што од утринава осамнаа шпекулации дека Мурињо е пред отказ. И покрај солидниот состав кој го има „Волчицата“, на табелата во Серија А е 9-та, зад екипи како Фиорентина, Болоња и Аталанта, но и лутиот ривал Лацио, што најмногу ги боли навивачите. Но, тимот на Мурињо го мачат и повреди, цело време има по неколкумина играчи шпто недостасуваат.
На 20 натпревари сезонава рома има скор од 8 победи, 5 нерешени и 7 порази, со килава одбрана која не делува сигурно со досега примени 24 гола. Воедно, тимот е во серија од три натпревари без победа.
„Тимовите кои целат на четвртото место се посилни од нас. Но, ние сме Рома, а луѓето веруваат дека моето име е Жозе Хари Потер Мурињо, па очекувањата се големи“, рече Мурињо правдајќи се за лошите резултати.
Мурињо ѝ донесе трофеј на Рома кога ја освои Европа конференциската лига во 2022 година, а наредната играше финале во Лига Европа. Но, лани не успеа да се пласира во Лигата на шампионите, а резултатите сезонава навестуваат дека Рома повторно ќе ја нема во елитата. Последното место кое води во ЛШ го држи Фиорентина со 5 бода повеќе од Рома.