Во водите на Охридското Езеро денеска се одржува јубилејниот 50-ти Охридски пливачки маратон, прва од четирите трки на распоредот на серијата Ултра пливачки маратони на Светската пливачка федерација (ФИНА).
Пливачите влегоа во водите на езерото на стартот на трката во 11 часот кај Свети Наум, а првите маратонци на целта кај Градското пристаниште во Охрид. оддалечено 25 километри, се очекува да стигнат за приближно шест часа.
Временските услови за маратонот се поволни, температурата на водата е 25 Целзиусови степени, но мал проблем претставува умерениот северен ветар што го бранува езерото и дува спротивно од насоката на пливањето.
Меѓу 12 пливачи и 7 пливачки учесници на маратонот се неколку познати имиња, како Марк-Антоан Оливје од Франција, светски шампион на 5 километри, бронзениот медалист од Олимиписките игри во Рио де Жанеиро и шестопласиран на Олимпијадата во Токио, потоа неговиот сонародник Аксел Ремон, светскиот шампион на 25 километри за 2019 година, како и нашиот Евгениј Поп Ацев, победник на ФИНА Светската серија на Ултра маратони 2019 година. Од нашите маратонци во водите на езерото влезе и Александар Илиевски.
Кај жените на стартот, меѓу познатите се освојувачката на сребро на десеткилометарскиот маратон во Доха, Осеан Касињол, како и ветеранката и нам добро позната неколкукратна победничка на охридскиот маратон, Пилар Геихо од Аргентина.
Наградниот фонд на пливачкиот маратон изнесува 10 илјади долари, рамномерно распореден во двете категории.
Првиот Ултра маратон што требаше да се одржи во Канада е откажан, додека после охридскиот на распоредот се уште две трки: на патеката Капри во Италија и Росарио во Аргентина.
Ова е 50-ти пат светската пливачка елита да се собере на Охридското Езеро, а 35-та трка од возобновувањето на Охридскиот пливачки маратон.
Пренос во живо од маратонот ќе оди на МРТ3 од 15:45 часот.
