Тито беше фасцинантна личност од многу аспекти и медиумите и издавачките куќи на просторите на поранешна Југославија со години по неговата смрт се занимаваа со животот на лидерот „зад завесата“.
Во книгите објавувани за него се спомнувани имиња на десетици љубовници. За некои од нив има докази и сведочења што ги поткрепуваат тврдењата. Покрај петте сопруги, потврдено е дека бил интимен со уште 12 дами, според порталот Urbanestrane.rs.
Како официјални животни сопатнички се спомнуваат Пелагија Белоусова, Луција Бауер, Херта Хас, Даворјанка Пауновиќ и Јованка Броз.
Кога бил млад и честопати без пари, ги освојувал жените со својот шарм, убавите манири и смислата за хумор. Со тек на време, авторитетот и власта станале неговиот најсилен афродизијак. Кога бил назначен за прв човек на КПЈ, воопшто немал проблем со жените – другарките „паѓале“ пред него.
Најслушани се гласините дека за време на бракот со Јованка, и во поодминати години, се гледал со актерки, масерки и оперски пејачки, а во серијал од неколку текстови ќе ви ги претставиме неговите пет сопруги.
Јосип Броз не пател долго по првата жена Пелагија.
Со Луција Бауер (позната и како Ана Кениг) се венчал во октомври, 1936 година во Москва.
Набрзо по венчавката со Бауер, по директива на Коминтерната Тито се вратил во Југославија, а младата сопруга се грижела за неговиот син Жарко од првата жена Пелагија, во партискиот хотел „Лукс“.
Луција, по потекло Германка, требало да ги добие потребните документи и со синот на Тито да дојде во Југославија, но тоа не ѝ успеало.
Во архивите е најдено писмо во кое Тито пишува за Луција Бауер и како таа се грижела за неговиот син Жарко.
„Ми беше многу тешко сам со детето (Жарко) бидејќи работев во Коминтерната, а тој беше сам дома и често правеше нереди во хотелот. Од управата на ‘Лукс’ постојано се жалеа од него. Кога се запознав со втората жена, Луси, ѝ предложив да дојде кај мене бидејќи се надевав дека ќе ми помогне да го чувам момчето. Кога се пресели кај мене, а јас подоцна видов дека многу добро се однесува со него, се согласив на нејзиниот предлог и се регистриравме во ‘Лукс’. Тоа се случи есента во 1936 година, пред да заминам од земјата на задача. Тоа го направив бидејќи таа се согласи да му биде втора мајка на момчето и да се грижи за него“, стои во писмото на Тито.
Понатаму вели дека мислел дека е „проверена“ бидејќи била „ќерка на беден работник“ и „жена на истакнат политички работник на германскиот Комсомол, кој беше казнет со 15 години затвор“, но ѝ верувал и поради тоа германските комунисти ја упатиле на школување во Москва.
Сепак, во еден момент сфатил дека со неа може да има проблеми и „неколку пати ја потсетувал дека не треба да има никакви врски со германските емигранти“, но кога дознал дека е уапсена, прво на кое помислил била неговата кариера.
„Сметам дека овде бев недоволно буден и во мојата партиска кариера тоа е голема дамка. Сметам дека тоа може да го искористат разни саботери на нашата партија во борбата против мене“, напишал Тито во писмото.
Трката за партиската функција овојпат била посилна од љубовта кон Луси.
„Тоа е нешто што може да ми пречи во работата“, признал Тито.
„Поради политичката кариера Јосип Броз ги жртвувал своите жени Пелагија Белоусова и Луција Бауер, бидејќи бил свесен дека саботерите на партијата може да го искористат тоа против него“, открива во неговата книга покојниот новинар и историчар Перо Симиќ.
Луција Бауер била стрелана во 1937 година од Гестапо, како дел од Големата чистка на нацистичка Германија.