И покрај одличните наслови и пристапот без дополнителни трошоци, претплатниците не се заинтересирани за понудата на игрици на Netflix.
По одличните резултати кои Netflix ги забележа за време на пандемијата, годинава дојде до отрезнување, односно пад на бројот на претплатници - за прв пат. Netflix уште пред актуелната криза многу размислуваше за некои новитети кои ќе ги задржат корисниците и откако ќе помине првичниот ентузијазам за одредена серија или филм.
Еден од тие новитети е влезот на пазарот на видео игри, а компанијата ги издвои TikTok и Epic Games како главни конкуренти за слободното време на корисниците. Првите игрици станаа достапни за корисниците во ноември минатата година, а сега нивниот број порасна на 24 наслови. Netflix планира да го удвои тој број, да го зголеми ангажманот и бројот на гејмери, бидејќи сегашните бројки не се охрабрувачки.
Поточно, споредено со вкупниот број на претплатници (околу 221 милион), уделот на оние кои играат игрици преку оваа платформа е помал од 1%. Досега понудените игрици се преземени нешто повеќе од 23 милиони пати, а просечниот број на дневни корисници е 1,7 милиони.
Netflix е свесен за овие податоци, а извршниот оперативен директор на компанијата, Грег Питерс, минатата година изјави дека се години далеку од моментот кога ќе имаат поголемо значење на пазарот, односно кога игриците, а не само сериите и филмовите, ќе ги привлече и ќе ги задржи корисниците на платформата.
Меѓу примерите на вакви игрици со кои сакаат да привлечат и задржат корисници е „Stranger Things“, која е веќе достапна, додека игрицата „Queen's Gambit Chess“, базирана на многу популарната серија која беше голем хит на овој сервис пред две години, исто така наскоро ќе пристигне.