Енигма, најголемиот брусен дијамант од 555 карати во светот, се продаде за 3,16 милиони фунти (3,8 милиони евра) во Лондон, откако неодамна беше првпат изложен.
Се верува дека реткиот црн или карбанадо дијамант се формирал кога метеорит или астероид удрил во Земјата пред повеќе од 2,6 милијарди години.
Дијамантот од 555,55 карати достигна цена од 3,16 милиони фунти на онлајн аукција одржана од лондонската аукциска куќа Sotheby’s.
Карбонадо дијамантите обично се наоѓаат во близина на површината на Земјата, што укажува на вонземско потекло.
„Се смета дека овој специфичен тип на црн дијамант потекнува или од метеорски дождови кои произведуваат природно таложење на хемиски пареи или од вонземско потекло - од експлозии на супернова кои формирале астероиди со дијаманти кои на крајот се судриле со Земјата“, соопшти аукциската куќа.
Дијамантот е една од најтешките материи за сечење.
Неговата форма е инспирирана од блискоисточниот симбол на моќ и заштита во облик на дланка, Хамса, кој исто така се поврзува со бројот пет.
„Големината, обликот и изворот на дијамантот Енигма го прават уникатен и неверојатен“, рече Тобиас Корминд, извршен директор на Mayfair, најголемата онлајн јувелирница во Европа.
Повеќето дијаманти се сечат на една од 10-те популарни форми, но обликот Енигма наликува на рака.
Енигма не е дијамант од квалитетни скапоцени камења, а карбонадо обично не се користи во накит или се продава на аукција, но неодамна стана популарен.
Тие најчесто се користат во индустриското дупчење поради нивната исклучителна цврстина.
Sotheby’s, каде исто така прифатија понуди за плаќање со криптовалути, го нарекоа дијамантот „вселенско чудо“.
