Со високите температури многумина бараат начини да се разладат. Клима уредот е најефикасно решение, но важно е да обрнете внимание на неколку работи.
Климатизерот е спас, но може да има и негативно влијание по здравјето доколку се користи неправилно. Треба да знаете дека во филтрите се собираат бактерии, габи, вируси кои можат да предизвикаат низа здравствени нарушувања од кои најчести се респираторните инфекции.
Поради тоа во летните месеци почести се настинките, кивавицата, акутно воспаление на грлото, воспаление на увото, па понекогаш и пневмонија. За да не дојде до тоа, задолжително треба редовно да ги чистите филтрите.
Од друга страна, ниските температури во просторијата може да доведат до влошување на состојбата кај повозрасните кои боледуваат од болести на коските и зглобовите. Поради неправилно користење на клима уредите може да се појави вкочанетост на мускулите на лицето, болки и вкочанетост во вратот, проблеми со видот, коњуктивитис, чешање и сушење на кожата.
На многумина им сметаат промените од топло во ладно. Поради тоа е важно да внимавате на разликата во температурата меѓу надворешната средина и просторијата. Таа не би смеела да биде повисока од 8 степени, што значи ако надвор е 35 степени, во просторијата би требало да биде околу 27.
