Во саботата на „Олимпико“ во Рим се одигра дербито од 17. коло во италијанската Серија А, Рома го совлада Наполи со 2:0, а тренерот на гостите, Валтер Маѕари, доживеа непријатна случка по натпреварот.
Искусниот стратег беше заборавен од тимот на култниот стадион. Наполи го напушти „Олимпико“ со клупскиот автобус без Маѕари во него, кој остана во Рим.
На видеото кое беше објавено се гледа како Маѕари збунето оди пред стадионот со куфер и торба во рака, а на крајот мораше да се врати дома со такси.
Инаку, неговиот Наполи го заврши овој натпревар со девет играчи, бидејќи беа исклучени Матео Политано и Виктор Осимхен, додека Лоренцо Пелегрини и Ромелу Лукаку ѝ ја донесоа победата на Рома.
Тоа беше само продолжение на лошите резултати сезонава за Наполи, кој ја брани титулата шампион на Италија, а моментално е само на 7. место со 27 бодови, дури 17 помалку од лидерот Интер. Рома е шеста со 28 бодови.