Кај брегот на Флорида, американската агенција НАСА пронајде дел од вселенскиот шатл Challenger.
Станува збор за „нов“ дел од леталото, прво од 1996 година и веројатно најголемото пронајдено досега. Challenger експлодира кратко по полетувањето во јануари, 1986 година. Сите членови на екипажот загинаа.
ТВ екипата што работеше на документарец на History Channel за Бермудскиот триаголник забележа дел од леталото во близина на Кејп Канаверал во март. Снимката ја погледнал и Мајкл Чанили од НАСА и идентификувал дека станува збор за Challenger.
„Ми застана срцето, морам да кажам дека глетката ме врати во 1986 година. Се сетив низ што сè моравме да минеме како нација“, изјави тој за AP.
Challenger беше лансиран на 28 јануари 1986 година и настанот беше пренесен во живо ширум САД. По само 73 секунди од полетувањето се случи експлозија, а истрагата покажа дека неочекувано ниските температури предизвикале проблем со ракетата.
Подоцна беа пронајдени остатоци од леталото, тешки околу 107 тони. Два фрагменти од левото крило беа исфрлени покрај брегот во 1996 година и тоа беа последните пронајдени делови сè до најновото откритие.
Станува збор за дел со големина од 4,5 метри квадратни, закопан во песок. Чанили верува дека се работи за трупот на Challenger.
