Астронаути од Агенцијата НАСА се обидоа да го разубедат раперот Боб ( B.O.B), кој собира пари за лансирање на сателит за да докаже дека Земјата е рамна.
Прв се огласи Тери Виртс, кој беше два пати во вселената.
„Можам да му заштедам многу пари. Земјата е округла, летав околу неа“, напиша астронаутот на својот Twitter профил.
Потоа во расправата се приклучи и Баз Олдрин, еден од астронаутите кој шеташе по површината на Месечината. Олдрин му објасни на раперот што е тоа орбита. И му понуди дека е многу подобро парите што ги собира за тој сателит да ги донира на жртвите од ураганите Ирма и Марија.
Сепак, астронаутите не успеаја да го убедат раперот.
„Луѓето обично ве обесхрабруваат од некоја работа кога нешто кријат“, напиша музичарот на Twitter.
За пет дена музичарот успеа да собере пет илјади долари. 169 лица донираа средства за ова негово истражување.
