Во последните неколку години НАСА напорно работи на враќање на Месечината, а во меѓувреме закажа и неколку мисии на Марс. Новото видео ги промовира нивните мисии и цели за во иднина, а од НАСА велат дека намената на оваа најава е да ја зголеми возбудата за претстојните проекти.
Колку и да звучи чудно, мисијата на Месечината е нешто што предизвикува големо ниво на возбуда кај членовите на НАСА, кои се свесни дека пред нив е огромна шанса чекор напред во истражувањето на вселената.
Последната човечка мисија на Месечината беше во 1972 година, но за наредните неколку години се закажани неколку мисии кои ќе го надополнат недостатокот од активност во минатото и ќе овозможат проучување на вселената на едно ново, повисоко ниво.
„Време е да го направиме наредниот скок. Го градиме следното поглавје од американското истражување на вселената, се враќаме на Месечината, за да можеме да одиме чекор понатаму, на Марс“, вели нараторот на видеото, актерот Мајк Роу.
Видеото прикажува импресивни фотографии на ракети и вселенски станици, како и голем број луѓе кои се вработени во НАСА. Новите мисии на Месечината и Марс се дел од Вселенската директива-1, која минатата година беше потпишана од претседателот на САД, Доналд Трамп.
