Голема е веројатноста дека неправилно седите зад воланот.
Многумина се сеќаваат на 90-тите, кога беше нормално да се видат „фраери“ како возат „залегнати“ во BMW E46 со едната рака на воланот на 12 часот, а другата кој знае каде (најчесто потпрена на отворениот прозорец).
Оттогаш работите се сменија многу. Теренците донесоа подобра видливост и побогата опрема, подобри опции за прилагодување на седиштата во потрага по идеална ергономија. И покрај тоа, сè уште гледаме возачи залепени за волан, но и оние со главите во покривот. Во случај на несреќа, на овие луѓе не им се пишува добро.
Има бројни променливи кои влијаат на удобноста зад воланот, ергономијата на возачот, но и безбедноста. Што се однесува до безбедноста, треба да ја имате предвид прегледноста на околината, положбата на нозете и висината. И воздушните перничиња се дизајнирани да работат оптимално само во една мала зона.
YouTube каналот MCMTV2 беше домаќин на професионален тркачки возач кој објасни како правилно да ја прилагодите положбата зад воланот. Најпрво, важно е да се намести седиштето во височина, потоа по должина, во зависност од положбата на нозете, кои не смее да бидат целосно испружени (како и рацете), што ја ограничува можноста за апсорпција на ударот. Рацете се ставаат во школска положба, приближно на „15 до 3“, а потоа се проверува положбата на рамената.
Зошто е важна положбата на нозете и висината на која седи возачот, погледнете во видеото во кое за само неколку минути детално е објаснето како правилно да ја поставите положбата за возење.
