Нова потенцијална вакцина против маларија се покажа ефикасна при тестирањето на бебиња во Африка, а тој напредок би можел да го намали бројот на починати од болеста што ја пренесуваат комарците. Годишно од маларија умираат половина милиони деца.
Вакцината е развиена од научници од Универзитетот Оксфорд, а е наречена R21/Matrix-M. Истата се покажа 77 проценти ефикасна во истражување од една година, спроведено на 450 деца во Буркина Фасо.
Водач на истражувањето е Адријан Хил, директор на институтот Jenner при Оксфорд и еден од главните научници кои стојат зад вакцината на AstraZeneca и Оксфорд, против COVID-19.
Во конечната фаза вакцината ќе се тестира во четири африкански држави, на скоро 5.000 деца на возраст меѓу 5 месеци и 3 години, пренесе Reuters.
Хил има големи очекувања од потенцијалот на вакцината којашто би можела да биде првата што ги исполнува целите на СЗО за ефикасност од 75 проценти.
Научниците низ светот со децении работат на развој на вакцина против маларија, комплицирана болест предизвикана од паразит што го пренесуваат комарците.
Од маларија секоја година се заразуваат милиони луѓе, а најмногу умираат деца кои живеат во најсиромашните делови на Африка.
Прва и засега единствена одобрена вакцина против маларија е развиена од GlaxoSmithKline, но ефикасна е во 30 проценти од случаите.