Американскиот кошаркар со италијански пасош Паоло Банкјеро беше избран во првиот пик на годинешниот НБА драфт што се одржа синоќа во Бруклин, а следната сезона ќе игра за Орландо Меџик.
Орландо по малку неочекувано го избра 19-годишниот крилен напаѓач, висок 2,08 метри, кој постигна 17,2 поени во просек во колеџ лигата минатата сезона додека играше за Дјук, додавајќи 7,8 скока и 3,2 асистенции по натпревар.
Банкјеро е роден во САД, а само два часа пред почетокот на драфтот потврди дека од следното лето ќе го носи дресот на италијанската репрезентација.
„Ова не е ни сон. Ова е како некоја луда фантазија. Сонував дека ќе стигнам во НБА лигата, но дека ќе бидам првиот пик... Тоа е лудо“, изјави Банјкеро во шок по драфтот.
Вториот пик на драфтот го имаше Оклахома, а тие го избраа Чет Холмгрен, додека Хјустон за трет пик го избра Џабари Смит. Киган Мареј следната сезона ќе игра за Сакраменто, додека Џејден Ајви ќе игра во Детроит.
Европа, од 58 избрани пикови, има десет кошаркари, меѓу кои и споменатиот првопласиран Банкјеро, а најмногу Французи (четворица).
Комплетниот список може да го видите ТУКА.