Се сеќавате кога Министерството за економија на веб-страницата за платформата „Дома си е дома“ употреби фотографија од езеро во Германија за да промовира домашен туризам во Македонија? Е па, не сме биле само ние смотани.
Италијанското Министерство за туризам се соочи со потсмев откако во официјалното видео за привлекување туристи во Италија беа користени снимки со луѓе во Словенија како пијат словенечко вино.
Видеото, дел од кампањата од 9 милиони евра, во продукција на комуникациската групација Armando Testa, беше нашироко исмеана од критичарите и на социјалните мрежи дури и пред да се дознае дека дел од снимките се направени надвор од Италија.
Насловено Open to Meraviglia, видеото прикажува компјутеризирана „инфлуенсерска“ верзија на Венера, симбол на италијанската уметност, како што е прикажана од Сандро Ботичели во неговото ренесансно ремек-дело „Раѓањето на Венера“.
Многу модерната „Венера“ облекува мини здолниште и е прикажана како јаде пица и ги претставува некои од главните туристички атракции во Италија, како што се Колосеумот во Рим или катедралата во Фиренца.
Историчарот на уметност Томазо Монтанари ја нарече рекламната кампања „гротеска“ и „безобразно“ трошење пари, додека корисниците на италијанските платформи за социјални медиуми се исмеваат со видеото.
Најконтроверзната снимка покажува група млади луѓе како се смешкаат на сонце и пијат вино во сцена што е прикажана како „типично италијанска“. Меѓутоа, гледачите со соколово око забележале дека станува збор за локација во регионот Котар во Словенија, блиску до италијанската граница, а шишето на масата има етикета за вино од Котар.
Групата за комуникација Armando Testa не беше веднаш достапна за коментар.
Италијанската министерка за туризам, Даниела Сантанче, членка на екстремно десничарската партија Италијански браќа на премиерката Џорџа Мелони, ги нарече критичарите на видеото „снобови“ и рече дека прикажувањето на Венера како инфлуенсерка има за цел да привлече млади луѓе.