Необична ситуација ѝ се случила на 101-годишна жена поради системот за резервации на авиокомпанија кој упорно ја мешал со бебиња.
Имено, Патриша е родена во 1922 година, но системот на American Airlines не ја признава таа година како датум на раѓање, туку била принудена да изјави дека е родена во 2022 година, за да може да резервира билет, пренесува BBC.
„Беше смешно што мислеа дека сум само мало дете, но всушност сум старица. Ќерка ми резервираше билет преку интернет, а компјутерот на аеродромот мислеше дека мојот датум на раѓање е 2022 година, а не 1922 година“, рече Патриша, поранешна медицинска сестра, која патувала со својата ќерка Крис, по последната мешаница на летот помеѓу Чикаго и Мичиген.
„Истото се случи минатата година и тие чекаа дете, а не јас. Конфузијата настанала и покрај тоа што бил резервиран како билет за возрасни, а не за дете“, изјави таа.
Патриша рече дека летала секоја година за да го посети семејството, но имало конфузија откако наполнила 100 години, и покрај фактот што патувала сама до 97-мата година, кога ѝ била потребна помош од членовите на семејството поради проблеми со видот.
Таа се надева дека авиокомпанијата наскоро ќе може да ја пресмета нејзината вистинска возраст.
„Би сакала да го поправат компјутерот бидејќи мојата кутра ќерка мораше да го носи целиот наш багаж и облека речиси еден километар од едната до другата порта“, додаде таа.
BBC изјави дека авиокомпанијата сè уште не одговорила на наводите.
Повикувајќи се на претходна мешаница, Патриша и нејзината ќерка морале да чекаат во авионот додека другите не се симнеле бидејќи не ѝ била договорена инвалидска количка.
И покрај тоа, вели дека со нетрпение го очекува својот следен лет наесен, кога ќе наполни 102 години.
