Бразилскиот виртуоз се пожали на болки во бутот поради што е ослободен од рептрезентацијата и ќе се врати назад во Париз.
Голем пех за Бразилците пред дерби дуелот на гости кај Аргентина во рамки на мундијалските квалификации. По синоќешниот тренинг Нејмар се пожали на болки во бутот и не отпатува за Сан Хуан со неговите соиграчи.
„Поради повреда на бутот Нејмар нема да игра со Аргентина во натпреварот од квалификациите за Светското првенство. Нејмар не отпатува за Аргентина со остатокот од бразилската репрезентација и во среда ќе се врати во Франција“, објави Бразилската фудбалска конфедерација.
Дополнија и дека бидејќи немало доволно време да се извршат дополнителни медицински прегледи, бразилскиот стручен штаб на чело со селекторот Тите одлучил да не го става на ризик бидејќи секако Бразил го има заверено пласманот на завршницата во Катар.
Иако бодовите на Бразил не му се императив, секој натпревар со големиот ривал Аргентина има големо значење. Во Јужна Америка ова дерби е познато како Суперкласико де лас Америкас, а го виката уште и Класико дел Атлантико.
Во спротивниот табор, Лео Меси е во составот, но и неговото играње е под знак прашалник. Тој не настапи за ПСЖ на последните два натпревара, но ѝ се приклучи на репрезентацијата, што предизвика нервоза кај парискиот клуб. Во четвртокот против Уругвај влезе од клупата, а селекторот Лионел Скалони синоќа потврди дека ќе биде во комбинација и против Бразил, а дали ќе настапи останува да видиме вечерва од 0:30 часот после полноќ.
Ова ќе биде прва средба на овие две репрезентации во актуелниот квалификациски циклус бидејќи во септември дуелот во Саун Пауло беше прекинат по само 6 минути игра и не беше доигран, а сѐ уште нема ни разрешница од ФИФА дали ќе се преигра или ќе има службена победа.
Натпреварот се игра на стадионот „Сан Хуан де Бисентарио“ во градот Сан Хуан на Андите, а ќе го суди уругвајскиот арбитар Андрес Куња.