Најдобрите фудбалери во светот во изминатата деценија и понатаму се примерот по кој се води Нејмар. Тој вели дека секојдневно се потсетува на Кристијано Роналдо и Лионел Меси за да се мотивира и да го достигне нивното ниво.
Според бразилската суперѕвезда, Роналдо и Меси се стандардот во светскиот фудбал и секој фудбалер треба да се стреми да учи од нив.
Додека беше во Барселона, Нејмар постојано тренираше и играше покрај Лионел Меси, а секоја сезона се соочуваше со Кристијано Роналдо, кој играше во дресот на нивниот најголем ривал Реал Мадрид.
Нејмар напредуваше многу откако пристигна во Европа. Во 186 натпревари за Барселона постигна 105 гола а одличната форма продолжи и во ПСЖ, каде погоди 39 пати во 43 натревари. Дваесет и шестгодишниот Бразилец ја освои секоја титула која можеше да се освои, но вели дека и понатаму напредува и е гладен за повеќе.
„Според мене, Меси е еден од најголемите фудбалери во историјата и е мојот личен идол во фудбалот. Со него учев секој ден, на тренинзи, на натпревари и од набљудување на неговата игра. А Роналдо е ѕвер. Да се игра против него е задоволство и чест, но секогаш мора да бидеме претпазливи бидејќи тој е толку паметен играч од кој може многу да се научи“, вели Нејмар.
Откако се пресели во Серија А, Кристијано Роналдо е клучен за успесите на Јувентус и продолжи да постигнува голови исто како во Реал Мадрид. А Лионел Меси и оваа сезона е најдобриот играч на Барселона, која се наоѓа на првото место на табелата.
„Тие се двајца играчи со кои можам да се поврзам, да се споредам. Учам од нив бидејќи сакам да победувам, да освојувам трофеи и да постигнувам голови. Од нив учам секој ден“, додаде Нејмар.
Тимовите на Кристијано Роналдо, Лионел Меси и Нејмар се на првото место на лигашките табели во нивните лиги и се меѓу главните фаворити за освојување на Лигата на шампионите.