Фудбалерите на Баер Леверкузен за прв пат во 120-годишната историја на клубот ја освоија шампионската титула на Германија, а на крајот имаше неверојатна прослава на „БајАрена“.
Леверкузен синоќа имаше можност да го совлада Вердер и да ја освои титулата во Бундеслигата, а тоа се случи по импресивниот настап на „Фармацевтите“ и триумфот од 5:0. Но, сцените кои следеа по последниот гол, изгледа како да не сме ги виделе.
Имено, навивачите на Леверкузен не го дочекаа крајот на натпреварот. На границата меѓу 89-та и 90-тата минута Флориан Вирц погоди за 5:0, а нетрпеливите навивачи не го чекаа последниот судиски свиреж, туку сите влетаа на теренот.
Судијата Харм Осмерс не сакаше да ситничари и да ги враќа навивачите на нивните места, па реши да свирне крај уште пред истекот на 90-тата минути.
Потоа на теренот истрчаа и останатите навивачи, а сите се обидоа да дојдат до играчите и да им одземат парче облека што ќе го чуваат до крајот на животот, а кое го означува моментот кога за прв пат во историјата ја освоија шампионската титула.
Поснаодливите навивачи отсекоа парче од мрежата на голот или од тревата од стадионот „БајАрена“ и ги однесоа дома. Се славеше до доцна во ноќта во градот популарен за фармацевтската индустрија, но и за упорните фанови кои титулата ја чекаат 120 години.
Тимот предводен од Чаби Алонсо успеа да стави крај на неверојатната доминација на Баерн, која траеше цели 11 години, бидејќи „Баварците“ како да си ја имаа присвоено титулата во Бундеслигата, но „Фармацевтите“ им покажаа на другите германски клубови дека не е невозможно да се борат со секогаш моќниот гигант од Минхен.
