Фудбал

Никој не го сака Игуаин: Јувентус не може да се ослободи од Аргентинецот

25. јуни 2019 - 13:58 | К.З.

Шампионот на Италија веќе второ лето по ред се обидува да се ослободи од напаѓачот Гонзало Игуаин, но како што стојат работите, станува сѐ потешко да се најде тим кој е заинтересиран за 31-годишниот Аргентинец. Последните вести велат дека Јувентус го нуди Игуаин на цела Европа, но безуспешно.

И покрај тоа што Јувентус неодамна го назначи Маурицио Сари за нов тренер, а тој е огромен фан на Гонзало Игуаин, сепак раководството на клубот не се откажува од намерата да се ослободи од аргентинскиот напаѓач.

Пред само неколку години страв и трепет за голманите во Серија А, а денеска непожелен во составот на Јувентус – приказната на Игуаин од врвот кон апсолутен заборав се одвива несреќно за него, но и за неговиот клуб, кој е „врзан“ со неговата плата до 2021 година.

Со 31 година, Игуаин и понатаму смета дека има што да понуди на највисокото ниво во европскиот фудбал, но неговите перформанси на фудбалските терени во последните две години го тврдат спротивното. Тој беше понуден на неколку кинески клубови, кои се подготвени да ги задоволат неговите финансиски апетити, но Аргентинецот е упорен во намерата да остане во Европа.

Минатата сезона Игуаин ја помина во два различни тима, со цел да се врати во посакуваната форма и да го убеди раководството на Јувентус дека треба да го задржи во своите редови. Првата полусезона играше за Милан, каде даде осум гола во 22 настапи, а потоа се пресели во Челзи, каде погоди само пет пати во 18 настапи за „сините“ од Лондон.

Јувентус се обидува да донесе нов напаѓач летово, а очите на раководството се вперени кон аргентинската ѕвезда од Интер, Мауро Икарди. Но, за да се случи таков трансфер, клубот мора да се ослободи од 7,5-милионската годишна плата на Игуаин, која го спречува италијанскиот шампион да инвестира во некој докажан фудбалер со статус на ѕвезда. Засега понуди за Игуаин нема од ниту еден тим во Европа, но летото е пред нас и до крајот на август многу работи може да се променат.

Коментирај