Дека Мундијалот во Бразил се дочекува на поинаков начин отколку во другите делови на светот, не е ништо ново, но во пресрет на почетокот на Светското првенство во Катар, сликите од бразилските улици го одземаат здивот.
Иако Светското првенство не е ни започнато, во Бразил веќе некое време е „национален празник на фудбалот“. Сè е средено во духот на претстојниот Мундијал.
Така, улиците на Бразил се украсени исто како што и доликува на земјата со најмногу титули на светските првенства. Веќе се украсени бројни улици за да биде сè подготвено за турнирот на кој Бразил е главен фаворит за освојување на шестата титула на Мундијалот.
Традицијата на украсување улици во Бразил датира неколку децении наназад, иако бројот на украсени улици се намалува со текот на времето. Сепак, од самиот север до југ на земјата, овојпат улиците се многу поукрасени од претходните мундијали.
Улицата Переира Нуњес во Рио де Жанеиро е постојано украсена од Светското првенство во Шпанија во 1982 година. Сè започна со навивачот Жулио, човекот кој им го пренесе наследството на сите и ја започна оваа прекрасна традиција.
Во украсувањето на таа улица годинава се издвојуваат графитите со лицата на легендарните играчи како Пеле и Гаринча, а внимание привлекува и цртежот на мускулест канаринец кој е маскота на бразилската фудбалска репрезентација.
„На пат кон Хекса“, пишува на графитот на улиците, а се однесува на патот до шестата светска шампионска титула.
Улицата 24 де Агосто целосно го промени својот изглед бидејќи знамињата на Бразил, Катар, амблемот на Светското првенство и амблемите на четирите најголеми тимови на Рио де Жанеиро (Фламенго, Флуминенсе, Васко де Гама и Ботафого) се насликани на неговиот асфалт.
Во Сао Пауло беа насликани големи мурали на Ла’ееба, маскотата на Светското првенство во Катар.
