Шефот на дипломатијата пред заминување, Никола Попоски, му порача на мандатарот Зоран Заев дека од утре да биде подготвен на критика и дека нема да му помине ако тврди дека ВМРО-ДПМНЕ е виновно за еден или друг неуспех.
„Од утре ќе почне нов период, кога ќе ве критикуваме. Оправдано или не, вие добро критикувавте. Господине Заев, сакам да ве потсетам дека доверба се гради чекор по чекор. Вие од почетокот покажавте дека сакате да избришете патос со демократијата, преку Собранието. Ве уверувам дека секоја ваша погрешна постапка ќе ве оддалечува од Македонија. Македонија не почнала со нас, нема да заврши со вас. Потребни ни се реформи во секој домен. Но, вие треба да покажете дека ќе прифатите критика. Нема да ви помине тоа дека ВМРО е криво за едно или друго. Ние од утре сме опозиција. Треба да ве поддржуваме во работите, а од вас ќе се очекува развој и човечна влада„, рече Попоски во Собранието. Потсетувајќи го Заев дека со години го блокираше Собранието, тој навести дека ВМРО-ДПМНЕ како опозиција ќе биде различна, бидејќи има одговорност пред граѓаните. Тој го обвини Заев исто така дека програмата му е резултат на препишувања.
„Вие повикувате ВМРО-ДПМНЕ да биде конструктивно и јас се согласувам. Ние треба да бидеме опозиција различна од вас, бидејќи имаме должност кон сите граѓани. Ќе ви треба многу повеќе од неколку слатки зборови, за да ги убедите другите дека можете да владеење нормално. Барањето кое го упативте за поддршка на програмата е беспредметно, бидејќи овде се ангажирани цели школи за препишување. Ако не можете да смислите добри мерки за одење напред, треба да прифатите туѓи.
Очекуваме резултати какви што ветивте. Сакам да ви порачам дека ќе бидеме тука за предлози и сугестии за подобро општество. Но, нема да бидеме тука за темните страни. Сега покажавте дека сте склон кон закани, за секој кој не мисли како вас. Јас сметам дека ова е момент на тест и за тоа како ќе се однесувате во иднина, а јас сакам да се однесувате поинаку“, му порача Попоски на Заев.
