Посредникот на ОН во разговорите за прашањето на името меѓу Македонија и Грција, Метју Нимиц закажа средба со претставниците на двете земји во Брисел на 11 и 12 декември.
Како што се наведува во соопштението од канцеларијата на Нимиц, средбата е дел од напорите на ОН за да им се помогне на двете страни да најдат заеднички прифатливо решение за прашањето на името.
Првично разговорите беа планирани за наредната недела, но беа одложени и презакажани за декември.
Премиерот Зоран Заев, по вчерашната средба во Скопје со градоначалникот на Солун, Јанис Бутарис, рече дека состанокот на медијаторот на Обединетите нации со преговарачите во спорот меѓу Македонија и Грција за името е одложен поради обврските на двете страни и пролонгиран за почетокот на декември.
„Тоа беше само желба, проектиран датум, веројатно заради обврските на двете страни е пролонгирана за почетокот на декември. Ќе се одржат ваквите средби, ги знам и деталите, не би ги објавувал затоа што организатор е господинот Нимиц, но реално знам дека нема причини за одложување на средбата“, рече Заев.
