Парижаните од доаѓањето на катарските сопственици во клубот одиграа вкупно десет двомеча во Лигата на шампионите и победија во четири. Прочитајте од кого загубија и како завршуваа нивните напади на најважниот трофеј.
Сопственикот на ПСЖ, Насер Ал-Келаифи вложи стотици и стотици милиони евра во тимот и минатото лето, во рекорден трансфер од 222 милиони евра го донесе и Нејмар од Барселона како главна ѕвезда во тимот, меѓутоа големите инвестиции ниту оваа година нема да му го донесат пехарот од Лигата на шампионите, кој толку силно го посакува и поради кој издвојува астрономски суми.
Сонот за титулата од Лигата на шампионите конечно да стигне во Париз нема да се оствари ниту оваа 2018 година, како што не се остваруваше ниту претходните, кога „принцовите“ подеднакво амбициозно тргнуваа во тој поход.
Кога гледаме наназад, списокот на неуспеси на Парижаните во нокаут фазата од најсилното натрпевање е се подолг, но открива и интересен податок, а тоа е дека секогаш губеле од голем тим.
Односно, дека речиси секогаш го добивале и најтешкиот пат кон завршницата и евентуалното финале, до кое исто така уште немаат стигнато.
Сезона по сезона, осминафинале и четвртфинале беа нивните последни дестинации, а од десетте двомеча победија во четири (осминафинале) – два пати против Челзи (2015, 2016), и по еднаш против Баерн Леверкузен (2014) и Валенсија (2013).
Во преостанатите шест во главно губеа после големи борби, а без дилеми најмногу ќе се памети приликата која ја пропуштија минатата сезона, кога изгубија на „Камп Ноу“ од Барселона, иако имаа предност од 4 погодоци на домашен терен од првиот натпревар.
Оваа зима, пред „принцовите“ застанаа „кралевите“ и тоа со двојна победа, прво на „Сантијаго Бернабеу“, па синоќа и на „Паркот на принцовите“, каде се очекуваше пожесток отпор на францускиот тим, без разлика на тоа што Нејмар не беше во комбинација за настап.
Пред ПСЖ следува крај на сезоната во француското првенство, извесно е освојување на титулата, па следат нови консултации во соблекувалната и средување на буџетот за создавање на нов тим, за следен напад на Лигата на шампионите.
Ова се сите неуспеси на ПСЖ во најсилното европско натрпеварување оваа деценија:
2017/2018, осминафинале, Реал Мадрид – ПСЖ 3:1, 2:1
2016/2017, осминафинале, ПСЖ – Барселона 4:0, 1:6
2015/2016, четвртфинале, ПСЖ – Манчестер Сити 2:2, 0:1
2014/2015, четвртфинале, ПСЖ – Барселона 1:3, 0:2
2013/2014, четвртфинале, ПСЖ – Челзи, 3:1, 0:2
2012/2013, четвртфинале, ПСЖ-Барселона, 2:2, 1:1