Пред 300 илјади години, на просторот на денешна Германија, луѓето ловеле мечки поради месото и коските, но и поради крзното кое им помагало да се загреат во ладните денови.
Научниците денес можат само да претпоставуваат што праисториските луѓе носеле како облека. Без пишани траги и релевантни физички докази за праисториската мода, единствено на што можат да се ослонат се непосредните артефакти. Затоа при ископувањата обрнуваат внимание и на најситните детали за да пронајдат некоја конкретна трага.
Студијата спроведена од истражувачите од Универзитетот во Тибинген и Секенберг центарот за човечка еволуција и палеолитот се бавела со испитување на коски од пештеска мечка од археолошкото наоѓалиште Шенинген во Германија, кога на нив биле откриени посекотини. Она што претставувало најголемо изненадување кога станува збор за овој наод е што траги од касапење биле откриени на коските од стапалата, место каде што не се наоѓа многу месо.
Оттаму и дошле до заклучок дека од нив било вадено крзното кое потоа било употребувано за изработка на облека. Заедно со откритијата во Боксгроув во Обединетото Кралство и Билцингслебен во Германија, ова претставува единствен пример од периодот на раниот палеолит кои упатуваат на експлоатација на крзната.
„Ова откритие ни дава нова перспектива“, вели професорот Николас Конрад, шеф на истражувачкиот пропект во Шенинген и додава дека сега сѐ е јасно околу тоа дека животните пред 300.000 години не биле користени само за храна, туку на луѓето за да преживеат им било неопходно и нивното крзно.
Ископувањата на локалитетот во Шенинген доведоа и до откривање на оружја, како копја и стапови за фрлање, заедно со скелети на цицачи кои во тоа време можеле да се најдат во оваа област. Сите овие наоди даваат јасна индиција дека експлоатацијата на големите тревопасни животни поради месото, коскената срж и коските навистина постоела, но и дека некои од нив најверојатно биле ловени и поради крзното.
Студијата е објавена во магазинот Journal of Human Evolution.
