Јомна Ал Сајед, новинарка на Al Jazeera, известуваше во живо од покривот во Газа кога во израелски воздушен напад беше срамнета со земја зграда од 14 ката наспроти неа.
Неколку моменти пред нападот, новинарката рече дека штотуку биле истрелани неколку ракетни предупредувања и дека сега треба да започне уривањето на целата кула Ал-Шарук.
„Оваа зграда има 14 ката, таа е една од најголемите и најстарите згради во Појасот Газа и во неа главно се сместени канцеларии на медиуми“, додаде таа.
Додека Сајед ја изговараше следната реченица, проектилите ја погодија зградата произведувајќи силен звук.
Набргу по ударот, нејзината колешка во студиото ја праша дали слушнала проектили, и таа извика: „О, Боже. Да, да, да, морам да се тргнам“ и избега.
Нападот беше дел од ескалацијата на насилството меѓу Израел и Палестина, најлоша од војната во Газа во 2014 година. Во четвртокот, израелски трупи беа стационирани на границата со Газа, а палестинските милитанти истрелаа ракети кон Израел.
Во новите воздушни напади врз Газа, Израел демолираше шесткатна станбена зграда во Газа за која се тврди дека му припаѓа на Хамас.
Најмалку 83 лица се убиени во Газа од ескалацијата на конфликтот во понеделникот. Во последните палестински ракетни напади, една ракета погоди зграда во близина на Тел Авив, ранувајќи петмина Израелци. Досега во Израел се убиени седум лица за време на конфликтот.