Британскиот премиер Риши Сунак денеска треба да потврди дека е договорена соработка меѓу Велика Британија, Италија и Јапонија за развој на нов борбен авион кој користи вештачка интелигенција.
Сунак е убеден дека заедничкиот проект на трите земји ќе отвори илјадници работни места во Велика Британија и ќе ги зајакне безбедносните врски.
Планот е земјите вклучени да развијат борбен авион од следната генерација, кој треба да стапи во употреба во средината на 2030-тите како замена за борбениот авион Typhoon. Британските власти се надеваат дека новиот авион ќе носи најсовремено оружје. Работата на неговиот развој е веќе во тек, а целта е да се создаде борбен авион кој ќе користи напредни сензори, па дури и вештачка интелигенција за да му помогне на пилотот кога е преоптоварен или под екстремен стрес.
Исто така, леталото треба да има можност да лета без пилот доколку е потребно и да може да истрела хиперсонични ракети. Меѓутоа, со оглед на тоа што изградбата на вака комплексен авион е исклучително скапа, Британците побараа партнери.
Во проектот најпрвин беше вклучена Италија, а потоа и Јапонија, што е уште еден показател за спроведувањето на британската стратегија за градење блиски односи со сојузниците во Индо-пацифичкиот регион, загрижени за однесувањето на Кина.
Британците очекуваат и економски придобивки
Оставена е можност и други земји да се приклучат на програмата. Франција, Германија и Шпанија веќе работат заедно на свои посебни дизајни, како и САД. Британците не очекуваат да профитираат од овој проект само на безбедносен план, туку очекуваат и економски придобивки, пишува BBC.
Се очекува дека развојот на новиот борбен авион би можел да создаде и одржи илјадници работни места во Велика Британија, но и да ја отвори вратата за поголем извоз на оружје во иднина. Сунак треба да ја започне првата фаза од програмата за време на денешната посета на RAF во Линколншир.
„Безбедноста на Обединетото Кралство, и денес и за идните генерации, секогаш ќе биде од најголема важност за оваа влада. Затоа мора да останеме на врвната одбранбена технологија, да ги надминеме и да ги надмудриме оние кои сакаат да ни нанесат штета“, најави британскиот премиер пред посетата.
„Меѓународното партнерство што го објавивме со Италија и Јапонија има за цел да го направи токму тоа, нагласувајќи дека безбедноста на евроатлантските и индо-пацифичките региони се неделиви. Следната генерација на борбени авиони што ја дизајнираме ќе нè штити нас и нашите сојузници ширум светот искористувајќи ја моќта на нашата одбранбена индустрија, создавајќи работни места додека спасува животи“, додаде Сунак.
