Секторот за компјутерски криминал при МВР до Основното јавно обвинителство - Скопје достави известување за настанот за кој говори Драган Павловиќ-Латас во интервју кај јутуберот Стефан Лазаров, емитувано на 15 февруари, информираат за МИА од скопското ОЈО.
Оттаму посочуваат дека надлежен јавен обвинител ќе даде насоки за натамошни дејствија и проверки.
Во исто време, и МВР информира дека поднело известување до надлежното Јавно обвинителство, во врска со објавеното интервју како подкаст на YouTube канал.
– Имено, Известувањето е поднесено по преземени мерки и активности од страна на Секторот за компјутерски криминал и дигитална форензика, заедно со целокупниот документиран материјал за понатамошно постапување, се наведува во соопштението на МВР.
Во интервјуто, кое од синоќа интензивно се споделува на социјалните мрежи, Латас раскажува како на 15-годишна возраст тој и неколку негови другари злоставувале девојка.
