Многупати сме биле сведоци на грубо однесување на возачите кои не ги почитуваат другите учесници во сообраќајот.
Велосипедите не се омилени во сообраќајот, често поради работите кои самите ги прават, но често се и жртви на арогантни возачи.
За тоа сведочи приказната за 49-годишниот Џејмс Тејлор од Бристол, Англија, кој веќе 17 години оди на работа со велосипед.
Во тој период имал многу блиски средби со некултурни возачи, а откако во 2018 година бил удрен од возач на автомобил, се впуштил во одмазднички поход.
На велосипедот поставил камера и почнал да ги снима сите незаконски дејствија на другите возачи.
„Досега имам пријавено 300 идиоти! Ова не е приказна ‘ние или тие’, тоа се несовесни возачи кои нѐ тероризираат нас нормалните луѓе. Веќе пет пати сум бил сведок на суд и тоа не ми е проблем, напротив“, вели Џејмс.
Тој за британските медиуми откри што најмногу му пречи во сообраќајот:
„Најлошиот инцидент го имав со агресивен возач кој како лудак ме следеше на главната улица и на крајот ме турна од велосипедот. Возев според прописите, но тој човек беше чуден и на крајот беше осуден. Најчеста грешка е тоа што возачите не оставаат доволно простор за велосипедистите. Кога поминуваат мора да бидат оддалечени најмалку 1,5 метри“, заклучи Тејлор.
Иако многу возачи, особено велосипедисти, го слават на социјалните мрежи како херој, други се згрозени од неговото хоби и мислат дека тој е личност која само сака внимание.
