Италијанскиот тренер Антонио Конте го напушти Интер со кој оваа сезона стана шампион на Италија, потврди миланскиот клуб.
Добро упатениот италијански новинар Фабрицио Романо тврди дека челниците на клубот не можеле да му обезбедат пари за засилување за Лигата на шампиони и дека тоа било главната причина за несогласувањето.
Италијанските медиуми пренесуваат дека причина за прекинот на соработката е несогласувањето меѓу Конте и клупското раководство околу следните чекори по освојувањето на титулата во Серија А и настапот во Лигата на шампиони следната сезона.
Соочени со финансиска криза, раководните структури на Интер побарале од Конте согласност за продажба на клучните фудбалери, меѓу кои Ромелу Лукаку и Лаутаро Мартинез во претстојниот преоден рок, како и да продолжи да работи во клубот за пониска плата.
Медиумите објавија дека 51-годишниот Конте ги отфрлил ваквите барања и двете страни, на крајот, постигнале заемен договор за прекин на соработката.
Конте имаше договор со Интер до лето 2022 година, а за предвремениот прекин на соработката ќе добие отштета од седум милиони евра.
Клубот брзо ќе почне потрага по негов наследник, а на врвот на листата е Масимилијано Алегри.
