Идната сопруга на принцот Хари, Меган Маркл, официјално потврди дека нејзиниот татко нема да биде присутен на кралската венчавка во сабота, пренесува „BBC“.
Маркл наведе дека секогаш се грижела за својот татко и се надева дека тој ќе има доволно простор да се фокусира на своето здравје.
Во изминативе неколку дена се отворија шпекулации дека Томас Маркл би можел да ја пропушти кралската венчавка поради операција, а таа информација денеска е официјално потврдена.
Поради тоа, тој нема да ја испрати својата ќерка до олтарот.
Томас Маркл моментално се наоѓа во Мексико, а неодамна се најде во центарот на вниманието поради монтирани фотографии.
Потоа, американскиот сајт „TMZ“ објави дека нема да дојде на венчавката поради тие контроверзии. На крај, сепак, соопштено е дека не доаѓа поради планирана операција на срцето.
Полусестрата на Меган, Саманта, изјави дека нивниот татко доживеал голем стрес.
На монтираните фотографии на новинарите се гледа како Томас се подготвува за венчавката на својата ќерка.
Засега не е познато кој ќе ја испрати Меган до олтарот.
Една од опциите е нејзината мајка, но би можело да се случи и Меган до принцот да дојде сама, без придружба.