Унгарскиот премиер Виктор Орбан денеска пристигна во Киев на разговори со украинскиот претседател Володимир Зеленски за актуелни прашања од унгарско-украинските односи, потврди претставникот за медиуми на Орбан.
Посетата на Орбан, отворен критичар на западната воена помош за Украина, доаѓа еден ден откако Унгарија го презеде ротирачкото претседателство со Советот на Европската Унија.
„Најважната тема на дискусија е можноста да се создаде мир“, напиша портпаролот на Орбан за медиумите Берталан Хаваси во одговорот по е-пошта до Reuters, додавајќи дека двајцата лидери ќе разговараат и за унгарско-украинските односи.
Унгарскиот премиер Виктор Орбан и украинскиот претседател Володимир Зеленски кратко разговараа минатата недела на маргините на самитот на Европската Унија во Брисел.
Унгарскиот премиер Виктор Орбан пред неговата посета на Киев вети дека ќе ги преземе „првите чекори“ за да помогне во обновувањето на мирот во Украина. Интервју со него синоќа беше објавено на унгарската телевизија М1.
На прашањето што може да направи Унгарија за време на нејзиното претседавање со Советот на ЕУ за да се стави крај на војната во Украина, Орбан рече дека првите чекори за промовирање на мирот ќе бидат преземени утре (2 јули).
„Ако го погледнете утрешниот печат, веќе ќе ги видите првите чекори“, изјави синоќа унгарскиот премиер, пред да се знае дека ќе ја посети украинската престолнина.
#Orban approached #Zelenskyy in #Brussels for a brief talk
— UATV English (@UATV_en) June 27, 2024
This is the case where you hear no words but the gestures and mimics are enough to make the video exciting to watch. pic.twitter.com/mKhhCGAuL1
Орбан истакна и дека Американците не треба да бидат изоставени кога е во прашање иднината на ЕУ и руско-украинската војна. Тој смета дека ЕУ ќе мора да се подготви за ситуацијата дека порано или подоцна Русите и Американците ќе се договорат.
„Каде ќе биде Европа овде? Кој ќе ги застапува нашите интереси? А кои се нашите интереси?“, праша тој, додавајќи дека унгарското претседателство не може само да одговори на овие прашања.
Британски Guardian доцна синоќа објави дека добил потврда од три извори дека унгарскиот премиер денеска ќе ја посети Украина.
Два извори од Будимпешта рекле дека Орбан се очекува да се сретне со претседателот Володимир Зеленски во Киев, како дел од првото патување на унгарскиот премиер во соседна Украина од почетокот на сеопфатната инвазија пред повеќе од две години.
„Предуслов за средбата беше да се реши прашањето за националните права. Во изминатите недели беше постигнат договор. Тој ќе може да го прогласи ова за успех“, изјави извор од Будимпешта запознаен со подготовките за посетата.
Орбан, најблискиот сојузник на рускиот претседател Владимир Путин меѓу лидерите на ЕУ, често се спротивставува на иницијативите на ЕУ за поддршка на Украина во нејзината одбрана од агресијата на Москва од инвазијата во февруари 2022 година. Орбан му рекол на Путин минатата година дека Унгарија никогаш не сакала да ѝ се спротистави на Русија.
На почетокот на 2024 година, на лидерите на ЕУ им требаа недели да го отфрлат ветото на унгарскиот премиер за одобрување нова помош од 50 милијарди евра за Украина. Минатата недела ЕУ ги отвори преговорите за членство со Украина, давајќи ѝ на земјата политички поттик во време на војната против Русија, иако има уште долг и тежок пат пред неа пред да може да се приклучи на блокот.