Осаменоста е во ранг на пушењето и дебелината кога станува збор за нејзиното влијание на скратување на животот и затоа полека станува јавен здравствен проблем, порачуваат научниците.
Истражувачи од Универзитетот Стенфорд и универзитетот во Хонгконг дојдоа до резултати кои покажуваат дека негативните емоционални ефекти на социјална изолација го скратуваат животот повеќе од пушењето.
Експерти веруваат дека хроничните воспаленија на организмот, најверојатно предизвикани од несреќност, ги оштетуваат клетките и виталните органи што влијае на нашето здравје, а меѓу останатото и на тоа колку долго ќе живееме.
Професорката Лори Тик од Универзитетот Џорџ Вашингтон, која не била вклучена во студијата, но со години се занимава со слична тематика, за Daily Mail вели дека воопшто не изненадува фактот дека осаменоста доведува до побрзо стареење од пушењето.
„Го проучувам ова уште од 2002 година и постоја многу национални податоци кои покажуваат дека осаменоста води до пократок животен век, поголема смртност и поголем број болести, така што овие податоци не ме изненадуваат“, вели Лори и тврди дека осамените луѓе имаат поголемо ниво на воспаленија и нервози, а се помалку активни што само дополнително придонесува за полошо здравје.
Претходно беше докажано дека осаменоста е тесно поврзана со зголемен ризик од појава на губење на меморија, односно создавање деменција за неверојатни 40%, како и за развој на дијабетес.
