Екипата на Манчестер Јунајтед беше поразена од Барнли на мечот од 24. коло на англиската премиер лига со 2:0.
Јунајтед и овој натпревар го играше без своите најдобри играчи. Пол Погба одамна е повреден, Скот Мектоминеј исто така, а последен кој се повреди беше Маркус Рашфорд кој ќе се врати во тимот дури во финишот на сезоната.
Во ваква ситуација, ослабениот Јунајтед не можеше да му парира на Барнли, па во 39-тата минута беше јасно дека „Црвените ѓаволи“ ќе имаат проблеми на средбата. По еден прекин топката стигна до Вуд и напаѓачот на Барнли со прецизен удар го матираше Де Хеа и го донесе својот тим до водство.
Манчестер Јунајтед во продолжение бараше погодок за израмнување и се обидуваше да стигне до победа и повеќе од потребните три бода, но надежите на домашните навивачи на Олд Трафорд ги уништи Родригез во 56-тата минута кога со еден убав погодок го донесе големото водство на гостите.
Потоа незадоволните навивачи на Манчестер Јунајтед почнаа да го напуштаат стадионот и во таква атмосфера „Црвените ѓаволи“ не успеаја да постигнат ни утешен погодок.
Ова беше прва победа за Барнли на Олд Трафорд по 58 години, а сега само погласно се поставува прашањето дали Оле Гунар Солскјер после ова ќе остане тренер на Манчестер Јунајтед или ќе се бара некој друг да ја врати старата слава на клубот.
