Италијанските медиуми известуваат дека клубот од Мадрид е подготвен да искешира дури 120 милиони евра за веднаш да го добие Рафаел Леау, играчот кој блескаше во последните кола за Милан.
Само што ја доби наградата за најдобар играч на сезоната во Серија А и веќе е на излезна врата. Рафеал Алешандре да Консејсау Леау има само 22 години, а по него веќе почнаа да простигнуваат понуди какво што е тешко да се одбијат. Милан го освои Скудетото, но сега го чека нова тешка битка - да одолее на понудите за своите млади играчи во текот на долгиот летен преоден рок.
Откако Реал Мадрид не успеа да го доведе Килјан Мбапе, кому ПСЖ му понуди баснословни примања само за да потпише нов договор, Реал е решен да не остане со празни раце и се сврте на друга страна - кон Чизмата. Ако во првата половина од сезоната никој не гледаше ништо повеќе од надежен играч во младиот Португалец, во завршницата од сезоната Леау блесна и го понесе Милан до своето прво Скудето после цели 11 години.
Леау, чие име Leão според Правописот на македонскиот литературен јазик треба да се транскрибира како Леаун (и ќе делува смешно, нели?), сезонава одигра 34 натпревари од можни 38 во Серија А и постигна 11 гола, но, внимавајте, асистираше 11 пати. Само во последните 6 кола, кога и се решаваше титулата меѓу Милан и Интер, Леау постигна 3 гола и 6 асистенции од кои 3 на последниот решавачки натпревар кај Сасуоло.
Крилниот напаѓач има договор со Милан до 2024 година, а „Росонерите“ во последно време преговараат со неговиот агент Жорже Мендеш за продолжување до 2026 година. Реномираната La Gazzetta dello Sport открива дека Мендеш веќе ја има в рака понудата од Реал Мадрид која изнесува 120 милиони евра. Леау во сегашниот договор има клаузула според која може веднаш да си замине доколку некој искешира 150 милиони.
Ќе биде интересно лето на трансфер пазарот, а очегледно напнато за Милан и Реал.