Откако Елтон Џон и Пол Сајмон најавија проштални турнеи, истото се одлучи да го направи и легендарниот Ози Озборн.
Половина век откако Ози Озборн ја почна својата кариера како член на бендот „Блек Сабат“, соопшти дека ќе ја започне својата последна турнеја.
„Зарем навистина поминаа 40 години откако настапувам сам? Навистина брзо поминаа“, прокоментира Ози Озборн.
Иако станува збор за последната турнеја, Озборн истакнува дека се уште не е крај на неговата кариера.
„Не се пензионирам. Нема повеќе светски турнеи, но ќе продолжам да правам свирки. Би сакал и некое време да поминам дома“, додаде тој.
„Доживеав некои фантастични искуства, тоа беше неверојатно патување. Само ми е потребно малку да забавам“, вели Ози.
Како што додава, после толку години сака да биде тука за преостанатите членови на неговото семејство.
„Уживам во улогата дедо. Не сакам да пропуштам растење на уште една генерација Озборн“, вели музичарот.
Сепак, пренесува дека не ја загубил страста, кога се настапите во прашање, и понатаму работи со исто темпо. Последната турнеја ќе започне во април во Америка, во Џексонвил, а ќе заврши во октомври во Лас Вегас.
Кога ќе биде готова оваа турнеја, ќе се посвети на можноста за правење на нов албум. Како што вели, има добри идеи за осум или девет композиции, а до тогаш ќе прави свирки.
„Тоа ми е работа и кога го велам тоа мислам на тоа дека се уште чувствувам страст кон музиката и работата која ја работам. Тоа е најубавата љубовна афера која сум ја имал – да се биде во бенд и да се свири за луѓе кои доаѓаат на шоу“, заклучи еден од најистакнатите уметници од минатиот век, кој сосема сигурно е инспирација за млади музичари ширум светот и ден денеска.
