S&P 500 и Nasdaq индексот благо пораснаа вчера на Волстрит, најмногу благодарение на растот на цените на акциите на технолошките компании, а тргувањето беше претпазливо по извештајот за инфлацијата во САД.
Dow Jones загуби 0,20 отсто, на 34.575 поени, додека S&P 500 зајакна 0,12 отсто, на 4.467 поени, а индексот Nasdaq 0,29 отсто, на 13.813 поени.
Инвеститорите се фокусираа на извештајот за инфлацијата, кој покажа дека потрошувачките цени во САД пораснале за 0,6 отсто на месечна основа во август, што е највисоко годинава, додека се повисоки за 3,7 отсто на годишна основа.
Зајакнувањето на инфлаторните притисоци главно е последица на растот на цената на нафтата во тој месец. Основната стапка на инфлација, без цените на храната и енергијата, во август порасна за 0,3 отсто на месечно ниво и за 4,3 отсто на годишна основа, побавно од еден месец претходно.
Забавувањето на основната стапка на инфлација ги охрабри инвеститорите и ја поддржа тезата дека американската централна банка нема дополнително да ги зголемува каматните стапки во септември.
„Мислам дека ФЕД не сака да го шокира пазарот со ново зголемување на каматните стапки од 0,25 процентни поени, кога се очекува да ги задржи стапките непроменети. Сепак, не е исклучено уште едно зголемување на каматните стапки до крајот на годината“, рече Викторија Фернандез, стратег во Crossmark Global Investment.
Иако не се очекува зголемување на каматните стапки на претстојниот состанок на ФЕД, инвеститорите се претпазливи бидејќи периодот на висока инфлација би можел да трае, а тоа би значело дека ФЕД ќе ги задржи каматните стапки повисоки од очекуваните.
Според анкетата на Reuters, ФЕД најверојатно нема да започне со намалување на каматните стапки пред април следната година. За растот на S&P 500 и Nasdaq индексот главно придонесе вчерашниот раст на цените на акциите на технолошките гиганти Meta, Tesla, Microsoft и Amazon за повеќе од 1 отсто.
Од друга страна, цената на акцијата на Apple падна втор ден по ред, за 1,2 отсто, откако компанијата претстави нова линија на iPhone.
На европските берзи цените на акциите вчера паднаа. Лондонски FTSE индексот ослабе за 0,02 отсто, на 7.525 поени, додека франкфуртски DAX се лизна за 0,39 отсто, на 15.654 поени, а париски CAC 0,42 отсто, на 7.222 поени.