Турскиот министер за надворешни работи го осуди палењето на Куранот пред џамијата во Стокхолм, потег што може да ја искомпликува и онака комплицираната апликација на Шведска за влез во НАТО.
Осудата дојде откако турскиот претседател Реџеп Тајип Ердоган во средата му рече на германскиот канцелар Олаф Шолц дека Шведска постигнала одреден напредок, но не доволно. НАТО рече дека највисоките дипломати од двете земји ќе се сретнат во Брисел следната недела.
„Го осудувам гнасниот протест во Шведска против нашата света книга на првиот ден од благословениот Курбан Бајрам“, твитна турскиот министер за надворешни работи Хакан Фидан, додавајќи дека е „неприфатливо да се дозволат антиисламски протести во името на слободата на изразување“.
Шведската полиција го дозволи настанот на кој присуствуваа околу 200 луѓе во средата, на почетокот на тридневниот муслимански празник Курбан Бајрам, велејќи дека безбедносните ризици „не се од природа да ја оправдаат, според сегашните закони, одлуката за отфрлање барањето“.
Шведскиот јавен радиодифузен сервис SVT објави дека настанот поминал мирно, велејќи дека човекот одговорен за демонстрациите искинал страници од Куранот, ги избришал чевлите со некои од нив, а други ги запалил, а потоа ставил парче сланина во книгата. Станува збор за 37-годишниот Салуан Момика, инаку бегалец од Ирак.
НАТО ја притиска Турција да ѝ даде зелено светло на Шведска пред самитот на Алијансата во Литванија на 11-12 јули. „Сега е време да ја пречекаме Шведска како полноправна членка на НАТО“, рече шефот на Алијансата, Јенс Столтенберг, на синоќешната прес-конференција.
Столтенберг претходно неделава рече дека разговорите во Брисел, што ќе се одржат во седиштето на НАТО следниот четврток, ќе ги вклучат министрите за надворешни работи и советниците за разузнавање од Турција, Шведска и Финска.
Во јануари, Анкара ги прекина разговорите со Шведска за нејзината апликација во НАТО, откако Расмус Палудан, шведско-дански активист кој е осуден за расистичка злоупотреба, запали копија од Куранот пред турската амбасада во Стокхолм.
Од друга страна, Швердска се надева дека веќе во јули ќе влезе во НАТО.
„Шведска ќе стане членка на НАТО“, рече синоќа шведскиот премиер Улф Кристерсон во интервју за јавниот сервис SVT.
„Никој не може да вети дека тоа ќе се случи конкретно во Вилнус или веднаш пред Вилнус, дури и ако тоа беше нашата амбиција цело време - и тоа е амбиција што ја споделуваме и со секоја друга земја на НАТО“, додаде тој.
Шведска требаше во пакет заедно со Финска да влезе во НАТО, но Турција го блокираше нејзиниот пат. Турција тврди дека Шведска штити членови на, како што ги смета, терористичките групи - обвинение што Шведска го негира - и побара нивна екстрадиција како чекор кон ратификација на шведското членство.
