Поранешната италијанска голманска легенда, Џанлука Паљука, ги спореди единиците на Интер и Милан во пресрет на вечерашниот полуфинален реванш од Лигата на шампионите.
Говорејќи за Rai Radio 1, Паљука најпрвин кажа што мисли за вечерашното дерби.
„Интер е фаворит по оние 2:0 во првиот натпревар, но јас не му верувам на овој поразен Милан. Убеден сум дека Интер има добри шанси, се надевам дека ќе оди во финалето. Но, мора да бидеме внимателни со овој ранет Милан, кој сигурно силно ќе се бори“.
Поранешниот голман на репрезентацијата на Италија (39 настапи, финале на Мундијалот 1994) потоа беше запрашан кој е подобар голман меѓу Мајк Мењан и Андре Онана, двајцата единици во своите тимови.
„И двајцата се многу силни. Јас би одел со Мењан, тој има поголемо искуство. Но, морам да кажам дека Онана игра многу важна сезона во својата прва година во Серија А“.
„Не мислев дека ќе се пробие толку брзо, мислев дека Хандановиќ ќе издржи повеќе, но потоа по само неколку натпревари Инѕаги реши да ризикува со Онана и излезе дека направи добар потег“.
„Но, Мењан во моментов е еден од тројцата најдобри голмани во светот“, заклучи Паљука, поранешен прв голман на „Нераѕурите“ со кои во 1998 го освои Купот на УЕФА.
Сега 56-годишниот Паљука, родум од Болоња, ја чуваше мрежата на Интер од 1994 до 1999 година. Играше и за Болоња и Сампдорија, а кариерата ја заврши во 2007 во Асколи.