Памела Андерсон неодамна присуствуваше на модна ревија на Модната недела во Париз, а нејзиниот изглед изненади многумина.
Откако неодамна за магазинот Elle откри дека повеќе не сака да се шминка за да има поголема контрола врз својот изглед, Памела тоа го покажа и на претставувањето на новата женска колекција на брендот Isabel Marant во Париз.
Таа за оваа пригода одлучи да облече долг жолт фустан без ракави, а стајлингот го заокружи со мала чанта и сандали. Иако многумина не ја препознаа веднаш поради новиот изглед, Андерсон остана доследна на нејзините тенки веѓи.
Таа непосредно пред ревијата тргна кон влезот, а нејзината насмевка и скромниот изглед ги воодушеви присутните гости. Но, Памела Андерсон не е единствената ѕвезда која беше забележана за време на модната недела во Париз. Покрај неа, во последните денови внимание привлекоа и Деми Мур, Кајли Џенер и Ким Катрал.
Потсетуваме, познатата актерка претходно истакна дека одлуката да оди природно ја донела во 2019 година, кога нејзината шминкерка Алексис Вогел почина по битка со рак на дојка. Својот нов изглед го нарече „ослободителен, забавен и малку бунтовен“.
