Аргентинецот Алехандро „Папу“ Гомес, кој беше дел од тимот кој го освои златниот медал и стана светски шампион, зборуваше за својот настап на Светското првенство.
Папу Гомес се присети на Мундијалот во Катар и откри кога играчите на Аргентина сфатиле во соблекувалната дека можат да одат до крај. Тоа било пред четвртфиналниот натпревар против Холандија.
„Од моментот кога пристигнавме во Катар како сите да знаевме дека ќе бидеме светски шампиони. Не знам зошто, но едноставно го имавме тоа чувство. Се сеќавам на ситуацијата во соблекувалната пред загревањето за дуелот со Холанѓаните. Се пресоблековме и ги гледавме пеналите на натпреварот помеѓу Бразил и Хрватска“, вели Гомес и продолжува:
„Сите се надевавме на победа на Хрватска. Знаевме дека ако Бразил загуби ќе бидеме светски шампиони. Кога Хрватска се пласираше во полуфиналето, почнавме да славиме во соблекувалната како да сме го победиле Бразил. Излезе дека сме биле во право“.
Го коментираше и однесувањето на голманот Емилиано Мартинес, кој многумина го прогласија за арогантен и безобразен.
„Зошто кога јас или другите ќе постигнеме гол, можеме да танцуваме и да славиме, а тој не може? Прослави одбранет пенал и за тоа нема ништо спорно. Ако танцуваше, не гледам што е проблемот. Тој е врвен голман, исклучително фокусиран и има јасни цели во животот и кариерата“, заклучи Гомес.
