Танзаниски патнички авион се урна во езерото Викторија при обид да слета во крајбрежниот град Букоба, близу границата со Уганда.
Авионот на домашниот авиопревозник Precision Air носел 43 луѓе, од кои 26 се успешно спасени и пренесени во болница, изјави танзаниско службено лице, пренесува BBC.
Двајцата пилоти го преживеале падот, но сѐ уште се наоѓаат заробени во кабината и се во постојан контакт со спасувачите.
Екипи од спасувачката служба и локални рибари се наоѓаат на местото на несреќата обидувајќи се да ги извадат луѓето кои и натаму се во авионот.
Досега се потврдени тројца загинати.
Спасувачите со јажиња успеале да го поместат авионот тип ATR-42 кон брегот каде водата е поплитка. Езерото Викторија е најголемото езеро во Африка и се наоѓа на тромеѓето помеѓу Танзанија, Уганда и Кенија. Еден крај од пистата на Букоба аеродромот лежи веднаш до езерскиот брег.
По падот авионот бил речиси целиот под вода, освен опашката.
Засега главен виновник за падот се посочува лошото време.