Лицето кое ноќеска беше примено на Инфективната клиника во Скопје е тестирано и нема корона вирус Covid-19, потврдија од Министерството за здравство.
Пациентот имал лесна клиничка слика, нема покачена телесна температура и неговата состојба е стабилна.
Тој пристигнал од Милано во Скопје со попладневниот лет на Wizz Air . Патникот поминал низ термалната камера, која кај него не дијагностицирала симптоматологија на болест. Првите симптоми ги почувствувал по доаѓањето дома, по што се јавил на Инфективната клиника во Скопје и бил примен во 22 часот. Од неговото пристигнување на клиниката, пациентот е ставен во изолација, по што му се направени тестови согласно утврдениот протокол.
Од МЗ велат дека будно ја следат состојбата и во континуитет се постапува по препораките на Светската здравствена организација, а од денеска се применуваат и нови зајакнати мерки за превенција од корона вирус.
