Проблеми за Баерн пред саботното незгодно гостување во Франкфурт и натпреварот со Лацио во Лигата на шампионите.
Францускиот латерален бек Бенжамен Павар излезе позитивен на COVID-19 на последното тестирање. Веднаш е ставен во самоизолација и ќе ги пропушти претстојните два натпревара.
„Бенжаман Павар беше тестиран позитивен на коронавирусот. Инаку, 24-годишниот е во добро здравје и се самоизолира во неговиот дом“, соопшти клубот.
Позитивниот тест на Павар доаѓа откако Томас Милер беше позитивен за време на настапот на Светското клупско првенство каде поради тоа го пропушти финалето.
Баерн го очекува незгодно гостување в сабота во Франкфурт кај тимот на Ајтрахт кој е во одлична форма со 4 победи во низа и 6 натпревари без пораз.
Павар ќе го пропушти и гостувањето во Рим кај Лацио во рамки на осминафиналето од Лигата на шампионите, натпревар кој ќе се игра во вторник.
Се очекува на десната латерална позиција Ханси Флик да го постави Буна Сар како замена за Павар на овие два натпревара.
