Мерсисајд дербито на „Гудисон Парк“ го отвори богатиот фудбалски викенд и заврши нерешено 2:2 за лутите ривали Евертон и Ливерпул.
Натпреварот од 5. коло во Премиер лигата за малку ќе завршеше со победа на момците на Јирген Клоп, но двете екипи сепак завршија само со по два гола откако ВАР „пресуди“ дека Мане бил во милиметарски офсајд пред погодокот на Хендерсон.
Она што го обележа натпреварот на кој се очекуваа многу голови, сепак беше жестоката игра на двете страни. Покрај петте жолти картони, судијата во 90-та минута покажа и црвен.
Прво, стоперот на Ливерпул Вирхил ван Дајк поради повреда на задната ложа уште во десеттата минута го напушти мечот, а за влакно тоа можеше да биде повреда со која се завршува кариерата - голманот на Евертон Пикфорд со двете нозе буквално влета во колената на Холанѓанецот.
Црвениот картон при крајот на мечот го заработи Ришарлисон по жестокиот лизгачки старт над Алкантара.
Она за што жестоко се дебатираше на социјалните мрежи беше дали Ван Дајк беше во офсајд или не кога беше „соборен“ од Пикфорд.